 |
| Foto: sayyod.com |
Demak shu sonlarni to'rttasini ushbu maqolada jamlashga harakat qilib ko'ramiz: Marhamat...
To‘yga taklif qilinganda...
Erkak: — Qancha to‘yona bersam ekan?
Ayol: — Qanday ko‘ylak kiysam ekan?
Farzand: — Qaysi artist kelar ekan?
* * *
Yomon odam yo‘q, yomon taassurot bor, xolos.
* * *
Xonandaga yoqmaydigan savollari beshligi:
1. Nega fonogrammada kuylaysiz?
2. Nechta uyingiz va mashinangiz bor?
3. Nima uchun falo-o-o-n qo‘shig‘ingiz o‘g‘irlangan?
4. To‘ydan qancha pul ishlaysiz?
5. Necha marta erga tekkansiz?
* * *
Shunchalik miyaga singib ketdiki, go‘yoki butun dunyo otlari Hosilaga patentlashtirib berilgandek!
 |
| Foto: sayyod.com |
Aksioma: telekanallar ko‘paygani sayin haqiqiy yulduzlar shu qadar kamayib boraveradi.
* * *
“Omadli” aktyor yoki aktrisa avval teatr sahnasiga chiqadi, so‘ng kino ekraniga, keyin esa shou-biznesga o‘tib ketadi.
* * *
Xayriyat, artistlar bor! Aks holda to‘ylar majlisbozlikka aylanib ketardi.
* * *
Oyoqning tomiri tortishsa, “Vay-vay-vay...” deb baqirish, keyin esa uni qo‘shiqqa aylantirish mumkin.
* * *
Serialdagi ko‘zlari yumuq Esmeraldadan hayotdagi ko‘zlari ochiq Esmeralda bankalari sharmandali chiqdi.
* * *
Erkaklar savoli ekranga ko‘chgan yagona ko‘rsatuv: “Bugun nima ovqat?”
* * *
Hollivuddan artist chaqirasanmi, bir yarim milliard so‘m pul sarflaysanmi, baron tugul graf haqida kino olasanmi, piratlarga vaaaaabshshshe farqi yo‘q!
* * *
Bugun bittasi o‘zining konsertida nikoh to‘yini o‘tkazmoqchi! Ertaga boshqasi sahnaga chiqib tug‘aman demasin ishqilib!
* * *
Dunyodagi eng qiziqarli va o‘chmas mavzu: o‘zganing cho‘ntagi!
* * *
U shu qadar samimiy san’atkorki, “Pari-pari” qo‘shig‘ini xuddi o‘zinikidek kuylaydi!
* * *
Biz, o‘zbeklarning eng yaxshi sifatimiz — mehnatsevarligimiz, eng yomon sifatimiz esa — mehnatsevarlarni g‘iybat qilishimizdir!
* * *
Mashhur telekanallarda yangraydigan mashhur yolg‘onlar:
“Sevimli kanalingizda!”
“Ko‘plab teletomoshabinlarning talab va istagiga ko‘ra!”
“Eng dilbar xonanda!”
* * *
Hamma yaxshi yashashni xohlaydi, biroq buni qo‘shiqchilar ko‘proq uddalaydi.
* * *
Ajabo, ba’zilar Xudodan emas, videokuzatuvdan ko‘proq qo‘rqishadi!
* * *
Hayotda hamma narsa bo‘lishi mumkin, biroq “Madaniyat va ma’rifat” kanali Poziljonov filmlarini qo‘ymasligi aniq!
* * *
Hurmatli xonandalar! Xorijga chiqishdan avval tushuntirish xati yozishni mashq qiling!
* * *
Vo ajab, tasodif shunchalik bo‘lar: eng original klip olsang ham chet elnikiga bo‘lib chiqadi-ya!
* * *
Bugun kuldiradigan (qiziqchi)lar ko‘paygan sari kuladiganlarning soni kamayib bormoqda!
* * *
Ba’zi seriallarni ko‘rib, “matriarxat” so‘zini beixtiyor tilga olasan!
* * *
Har qanday yangi qo‘shiq — unutilgan eski xonishdir!
* * *
O‘zbek kinosining durdona filmlarini ko‘rmoqchimisan? Unda bayramlarni kut!
* * *
“Uxlavotti Mario, dam ovotti Mario”... Bir paytlardagi ushbu qo‘shiq ijrochisi Ergashevning o‘zi uxlayapti, shekilli, ijodida jimjitlik!
* * *
Tirikchilikning aybi yo‘q! Ammo poraxo‘rlikning emas!!!
* * *
Qalpoq deganda bosh kiyim yoki ko‘rsatuvdan ko‘ra katta qorin ko‘z oldingga keladigan bo‘lgan!
* * *
Agar “Dekameron” muallifi Jovanni Bokachcho go‘ridan tirilib kelganida bormi, “telegram”dagi lavhalarni ko‘rib, go‘riga qayta kirib ketgan bo‘lardi!
* * *
Gap taqir kallada emas, balki shu kalladan chiqadigan tuturiqsiz gapda!
* * *
O‘lganlarning qo‘shig‘ini ayt — ham ommalashadi, ham tekinga tushadi.
* * *
Qistir-qistir — artist so‘zining o‘zagidan olingan bo‘lib, uning JUDAYAM yoqimli shaklidir.
* * *
Darvoqe, qistir-qistirni artist ham, ham gaishnik ham yaxshi ko‘radi. Farqi — ulardan biri hammaning ko‘z o‘ngida ochiq-oshkora oladi.
* * *
Olim bo‘lma, otarchi bo‘l — uying ko‘payadi!
* * *
Xonandaning kallasini puldan boshqa narsa chulg‘aganmi, demak, u... uxlayapti!
* * *
To‘y oqshomini uning egasidan ham ko‘proq yaxshi ko‘radigan odam, bu — san’atkordir!
* * *
Ilgari shlyapani mushketyorlar, kovboylar va kolxoz raislari kiyishgan. Bugun esa... Davron G‘oyipov, Valijon Shamshiyev va Melis Abzalov!
* * *
Jasur Umirovning iste’dodi qanchalik zo‘r — noma’lum, ammo uning Oysara opa bilan Jumagulni estradaga olib kirgani aniq!
* * *
“Ley-ley-ley-ley-ley…” — bu ham qo‘shiq, aniqrog‘i, klip!
* * *
Qiziqchilar va QVZchilarga e’tiborga berganmisiz: nuqul balkonda o‘tirganlar ustidan kulishadi. Ha, puli kamlar hamisha kamsitilgan!
* * *
San’at ahli biladigan haqiqat: Konsert – to‘y uchun tikilgan pullardir!
* * *
Erni er qiladigan ham, qaro piar qiladigan ham xotin!
* * *
Savol: konsertlarda nima uchun birinchi qatorda mashhurlar o‘tirmoqda? Javob: old qatorda chiptalar qimmat!
* * *
Matbuot kotibi — xonandadan pul olish evaziga uni targ‘ib va matbuotdan himoya qiluvchi monopolist qalamkashdir!
* * *
Agar ertaklardagi jodugar tirilganida... videoklipda ko‘pkari chopardi!
* * *
Mushuk tekinga oftobga chiqmaganidek, artist tekinga... to‘yga bormaydi!
* * *
Yo‘q, artistlar to‘yga bepul borishadi! Faqat... bir-birinikiga!
* * *
Keyingi yillarda hayvonlar haqida aytilgan eng mashhur qo‘shiq: “Qizmi bu, kiyikmi bu?”
* * *
Estrada va maqomning moddiy tafovuti haqida bilishni istaysanmi? Marhamat:
Shahzodaniki — “Jip”, maqomchi opaniki esa — “Matiz”!
* * *
Ishlamay qo‘ydingiz, xorijlik san’atkorlar! Shuning kasriga bizda xit qo‘shiqlar yo‘q!
* * *
Afandining gapi — haqiqat:
Bu dunyoda hamma — plagiat.
* * *
Har qanday yangilik — unutilgan eskilikdir, Yangi qo‘shiqlar esa Oxun va Muhriddinnikidir.
* * *
Fonogramma, bu — taqiqlanmagan doping!
* * *
Agar to‘ydagi pul teruvchilar paxta dalalariga yuborilganida reja albatta bajarilgan bo‘lardi.
* * *
Soqqasini to‘la va xohlagancha televizorga chiq. Jonga tegsa(ng) o‘chirib qo‘yasan!
* * *
Gazetada ishlaydiganlar emas, gazetada ishlatadiganlar boy bo‘ladi!
* * *
Gap e’tirofdami yoki billur haykalchani olishda?
* * *
To‘y haqidagi qarorlar chetlab o‘tadigan maskan bitta — u ham to‘yxonadir.
* * *
Bugun ham stadionlarda konsert berish mumkin! Nima ko‘p — mini stadion!
* * *
Agar ovsinlar bir-biriga paxta otmaganida, balki bojalar kabi bachkana bo‘lishardimi, nima dedingiz?!
* * *
Qadim-qadim zamonda o‘rmonda adashib yurgan Qizil shapkacha bugun nihoyat videoklipda chiqdi!
* * *
“Agar baqirib qo‘shiq aytmasam, balkondagilar uxlab qoladi”, deb o‘ylasa kerak Jahongir Poziljonov.
* * *
Bugun yulduzlar shunchalik ko‘payganki, osmonga sig‘may, yerga tushib ketgan.
* * *
Savodsiz, erinchoq va qo‘rqoq! Agar rejissyorlarimiz shu qusurlardan xoli bo‘lishganida tarixiy filmlar ham olishardi!
* * *
Ovoz eshakda ham bor, ammo gap faqat hangrashda emas.
* * *
Qiziqchilarimiz qiziq-da: sahnaga chiqqan zahoti “biz bachkana emasmiz” deganlari eslaridan chiqadi-ketadi.
* * *
Mashhurlarni qo‘rqitadigan, muxlislarda savol uyg‘otadigan, raqiblarni quvontiradigan so‘z, bu – ZAPRЕT!
* * *
Ritorik savol: Sevara katta pulga o‘rgangani uchun bizda konsert bermayaptimi?
- - - - - - - - -
MANBA: sayyod.com
Комментарии
Отправить комментарий